【數學】DSE 5** 心得分享

運用自創嘅技巧同方法,只係用咗大約一半時間就完成試卷,成功獲取 5**,驗證咗我嘅技巧同方法真係work。到底點先可以攞到 level 5 以上



By: K Fung 🤔


先講分數,要攞Level 5大約70% 以上 、 Level 5** 則大約 90 % 以上。想攞 Level 5 以上,要有三方面嘅準備,我會逐樣詳細講。 (長文慎入)


  1       了解出卷模式和考核範圍

一定要熟悉 syllabus,知道DSE要求你識啲咩 concepts,唔好跟教科書溫。 因為教科書有好多同考試無關嘅內容,用黎增進你嘅數學知識 (or填充版位)。 你可以去EDB網頁 check 返個 curriculum (page 17),份文件講明你要識啲咩,你可以逐項睇返自己掌握咗果啲concepts未,未就要操練多啲。

另外,其實 DSE 內容分咗做 foundation non-foundation partnon-foundation topics只會喺 section B出,你知唔知道呢? 好多同學都唔知道,結果喺 section A 不停諗 non-foundation 嘅嘢,諗錯哂方向,結果嘥咗好多時間。 點樣分 foundation / non-foundation ? 同樣都喺上面份EDB文件寫哂。


  2       Concepts 要清 + 熟習常見題型

Concepts 要好清,鬼唔知咩! 但點先叫清? 你要串連到topic topic嘅關係先叫清,唔好當topics 係割裂,有關嘅topics 要一齊溫,因為DSE 好多題目都係 cross topics 咁出。 舉個例,stat 好多時會同 probability 一齊出、做 coordinates 好多時又要用到 geometry 嘅技巧、log 都可以夾variation straight line 一齊出,etc

要熟習常見題型,一定要操 past paper (DSE + HKCEE + HKAL),又係廢話? 但點操呢?個人覺得最好分 topics、分題型咁操,因為咁先會操得熟、先會睇到佢出題嘅模式,捉到佢條路(所以你要有分topic及題型的past paper)。 咁要做幾多年 + 做幾多次先夠? 想攞5以上最少做20年啦,要做到你一諗起某個 topic,都講得出past paper常出邊類型題目、有咩題目陷阱、知道佢啲陰濕位先叫操得熟。 

舉個例,考equations of circle 佢成日會陰你x^2 , y^2 coefficient 唔係 1,呢啲中伏位要好清楚。 要留意返有啲 topic DSE 有但 HKCEE 冇,例如 permutation and combinationLocus 等等,呢啲 topics就要做坊間練習喇。

坊間練習使唔使做呢 ? 除咗HKCEE 冇果啲topic個人覺得做熟哂past paper 已經夠。 如果你past paper 已經做到滾瓜爛熟,重有時間剩的話,都可以買啲比較深嘅 mock paper 操下,我推薦 Joint-US 出嘅 “DSE Rehearsal Mathematics Compulsory Part


呢本勁難,可以操到比較深嘅題目,但真係做好哂 past paper 先好諗坊間練習。




  3       學習答題技巧,提升答卷速度

淨係識做唔夠架,冇答題技巧的話,你會做唔切份卷,咁就冇咗個Level 5/5**,好多能力高嘅學生就係咁衰咗。 所以當你 concepts 清咗、又熟習常見題目之後,你要鑽研答題技巧提升速度。 要提升速度,絕對唔係心算快啲、寫快啲咁簡單。我三張幾野,心算同寫字速度一定唔夠你地快,但憑住技巧我可以用一半時間就做完份卷,所以你地有技巧嘅話都一定得。 方法如下 :

Paper 1       要做得快,一定要熟讀 marking scheme,知道邊啲係key steps (比分位),多餘嘅steps就唔好寫太多,好多時做唔切份卷係因為寫咗好多無謂嘢。 要留意分數,知道咩位比分,果啲steps一定要寫,其餘就唔使寫得太仔細。 舉個例,近年計 partial variation k1k2 (variation constants),完全唔使show steps (因為得3),直接寫solving eqt 1 and 2,然後寫答案就得,所以你唔使自己計,用計數機就得。 總知就要睇分做人啦。

Paper 2      MC一定要有技巧, steps by steps做一定唔夠時間,技巧有好多,最簡單的排除、代入、假設等方法,想學可以去我 youtube   facebook 睇,我錄咗好多短片教答題技巧。

除咗答題技巧外,一定要識用計數機。 計數機本身有好多function,例如 complex numberpolar coordinates都有得篤機,就算唔識做都計到答案。 另外一定要入prog簡化運算,我自己就寫咗8 條有用嘅prog (所以用咗兩部機),正常咁計要兩三分鐘,篤機只需要 5 秒鐘,可以慳好多時間。 但記住識用先好用,唔係會弄巧反拙。


    總結    

每年只有 15% 考生Level 5 或以上、1.5% 考生5**,其實得好少,所以我勸你盡早開始預備,做我上面所講嘅嘢,機會係留比有準備嘅人架。

祝你地成功奪取佳績 ^_^