ULIFE? OCAMP? 大學生生活有幾精彩?

大家有無幻想過大學既生活會係點?大學同中學係截然不同,更自由、更輕鬆,等我同大家講下大學生活係點一回事。 






     迎新營 

新仔入到大學無人無物,第一時間緊係報返個 ocamp (迎新營)識朋友。迎新營有長有短,短既只有一兩日,長既可以玩足十日,至於迎新營有 D 咩玩就到大家去探索啦。 不過有D人覺得 ocamp 玩埋哂D 無聊game好無聊,但我覺得人生唔玩 ocamp 係一個遺憾,而且唔同 ocamp 有唔同風格,適合唔同人,揀一個岩你既ocamp,可以識班志同道合既frd,分分鐘係大學陪你4年一齊戰鬥既frd,好彩既話話唔埋可以識到......=]

大學唔同中學,無班別,所以 ocamp 係識朋友既主要途徑。大學有一兩個朋友可以陪你上堂,分組做 Project 時有人同你一組,仲有得一齊做功課,一齊食飯,所以 ocamp 去得就去啦。有 D人唔想去 ocamp,但又驚識唔到朋友,其實如果你分人夠 active,去到邊都識到朋友 =]


     學分 (Credit)  

去到八月尾就係時候 reg 科。大學同中學一樣分兩個學期,但唔同既係,大學D 科要自己 reg。每個 course 有一定學分 (credit),想讀幾多 Credit 就係自己決定,但一定要係大學四年之內讀夠一定數量既credit


     上莊

至於上莊(學生組織),係大學五件事之一。上莊係指同一班同學朋友一齊合力搞好一支莊,好似經營一個機構甘:要收會員,宣傳、搞活動比會員參加、仲要選下莊……好多人都話上莊可以學識好多野,尤其識到一班甘苦與共既莊員,但代價就係燃燒 GPA……


     大學成績GPA    

GPA (Grade Point Average) 係大學既學業成績,大致上GPA 滿分係 4或者 4.3GPA 3 4 係唔少大學生既夢想,但對於內地生黎講,過3簡直濕濕碎。上到大學,好多人開始研究邊個 course grade,邊個 professor 好人,而且一個course可能有兩三個timeslot,以前聽人講過:「上晝上太早啦,都係訓多陣,聽日下晝再上過。」原來係真架,真係好自由。

不過有人覺得大學唔應該整係讀書甘dry,以我讀左甘多年既經驗,有人話識人好過識字,如果整係埋頭於讀書而忽略人際或其他方面發展,就會變左中大碩士生寄200封求職信都無回音。


     住宿 (Hall)  

住宿係大學生活不可劃缺之一。我諗大部分香港中學生都未住過宿,所以住宿可謂人生無法忘記既一段記憶。住宿可以嘗試離家既滋味,開始感受到一星期先見到屋企人一次既個種自由自在懷念,更得難得係有一個同你日對夜對既 roommate (宿友)(如果室友係難頂,甘只好祝好運=) )。但間間大學既入宿條件唔同,所以唔係個個人都有宿住。


     上堂    

由於時間表係自己 set,所以每個人既上課時間都唔同。有D人唔想甘早起身既,可以唔選上晝堂。有 D人下晝有野做既,可能調去上另一堂,十分自由,你唔上堂都仲得。好彩既話,可能有一兩日唔洗返學 (dayoff),唔好彩既可能日日返學,仲要係天地堂 (上晝同下晝中間有一大段時間無堂),所以選左咩科影響你未來半年既作息。


     做功課    

大學都有功課做,但無中學甘多(應該),應該布置功課起,多數有一兩個星期甚至一個月時間做。但唔同中學既係,中同遲交比老師記個名就算,大學遲交當無交,真係好嚴格 lol

大學D功課好多時用電腦做,所以每個大學生枱上面都有部 notebook。除左功課外,notebook入面仲有 lecture note (課堂筆記),電子書,總之就係一部電腦走天涯。

大學對於誠信係非常非常重視,抄襲係不可原諒既行為,即使係功課,比人捉到輕則 0 分,重則踢你出校,即使唔踢出校,係張證書到都係label 住作幣記錄,真係水洗都唔清D


     大學 Canteen    

每間大學都有幾間 canteen,無論好唔好食,都要係到食。有D大學(港大城大) 近市區,行幾步就可以出街食。但有 D 比較偏僻既大學 (中大科大),要搭一程車先出到去,真係係學校食好過。所以早餐、午餐、晚餐、宵夜,都係留係學校食,食足四年……我記得 year 2 尾個陣,已經食到無野好食,對住碟飯,真係望住就飽,減肥一流!!


     考試    

考試係大學生最勤力既季節,即使平時唔上堂都好,考試前都一定會望兩眼本書。大學考試同 DSED似,唔洗日日考,有 D course 甚至唔洗考試。考試季節,大學圖書館多數坐爆人,um…都幾有温書氣氛既。如果考試 Fail 左一科,就要重讀。考完試之後就 sem break(放暑假),間間大學 sem break 長度唔同,多數一兩個月,科大有三個月。

同上,考試作弊比人捉到好大獲。




相關文章